Su mundu de sa cultura e de s’ispetàculu italianu si mobìlitant pro Mediterrànea, sa missione impinnada in defensa de sos migrantes, chi cun sa nave Mare Jonio, chi addobat bandera italiana, solca su tratu de mare intre Lìbia, Malta e Itàlia. Pro dda sustentare, una chentina de intelletuales e artistas ant promòvidu ‘la via di terra’, un’ initziativa itinerante chi, finas a su 30 de su mese santugaine, at a fàghere tapa in sos teatros de 9 tzitades, pro reading e performance subra mùsicas de Giovanni Guidi e Paolo Fresu.
Si cumentzat su 24 de su mese de santugaine dae Casteddu, posca Bologna, Torinu, Venètzia, Gènova, Palermu, Roma, Nàpoli e Milanu. “Si serrant is portos e si faghent muros de filu ispinadu a amparu de un’ aparente seguridade. Nois – narat s’iscritora Michela Murgia – non podìamus prus istare a castiare. Amus promòvidu una sèrie de initziativas de finantziamentu. Est su primu eventu coordinadu, chi serbit pro sustennere su crowdfunding pro sa nave Ionio e bolet rapresentare una àtera idea de paisu e de acasàgiu”.
Sa nave est partida su 4 de su mese de santugaine cun unu prèstidu sutascritu dae chimbe garantes, unu de sos cales est Alessandro Metz, s’armadore de sa nave. “Semus in su Mediterràneu pro monitorare, denuntziare e, cando netzessàriu, fintzas sarbare – ispiegat – a nùmene de totu su progetu Mediterrànea, chi est diveninde un’ idea colletiva, torro gratzias a chi at a artziare in sos palcos e chi at a intrare in sos teatros pro assistire e contribuire a su crowdfunding”.
