Su M5S non tenet prus unu candidadu presidente pro sas eletziones regionales in Sardigna, su freàrgiu chi at a bennere. Mario Puddu, ex sìndigu de Assèmini, binchidore de sas ‘regionarie’ , at detzìdidu de si retirare a pustis de sa cundenna pronuntziada oe, pro abusu de ufìtziu cando fiat sindigu de Assemini, de su gup in sos cunfrontos suos .
“Oe est una die trista pro mei: su Tribunale de Casteddu mi at cundennadu pro abusu de ufìtziu in riferimentu a unu fatu acontèssidu cando fia sìndigu de Assèmini”, iscriet s’esponente M5S in sa pàgina sua Fb.
“So convintu de àere fatu cuddu chi depìa faghere, in s’esclusivu interesse de sos tzitadinos. Nointames sa cundenna est meda diferente dae cussas cales semos istados abituados a bidere in custos annos dae banda de chi nch’amministrat e chi nche guvernat, est però fundamentale a ndi bessire dae onnia imbaratzu sa fortza polìtica in cale creo a forte. Pro custu, àncora in antis de sa sebera de su Movimentu, fatzo unu passu de ladu, retirende sa candidadura”.
