Su cussìgiu comunale de S’Alighera at dadu s’ok a su referendum pro sa prosecuzione de s’istrada istatale 291 a bator corsias. Su cuesitu referendàriu propostu dae su sìndigu Mario Bruno – “Pro cantu de cumpetèntzia de su Comunu, ses favorèvole a sa prosecuzione de sa SS291 a bator corsias?” – at a èssere sutapostu a s’atentu de sos tzitadinos chi, prima borta in s’istòria de s’amministratzione aligeresa, ant a èssere mutidos a s’espressare in manera autònoma in su completamentu de sa Tàtari-S’Alighera.
At a èssere sa Cummissione tècnica prevìdida dae su regulamentu e assentada dae acadèmicos e giuristas a s’espressare in s’ammissibilidade de su cuesitu. In tantu sighit sa mobilitatzione pobulare e de totus sas fortzas polìticas, sotziales e tzitadinas de sa Comuna de S’Alighera chi atestant pro mèdiu de sas pròpias firmas la recherta imbiada a sos cumpetentes setores de su guvernu. S’abetat chi su sutasegretàriu a sa presidèntzia de su Cussìgiu de sos ministros e segretàriu generale de su Cipe, Giancarlo Giorgetti, si torret disponìbile a sa rechesta de auditzione fata dae sos oto sìndigos de sa Retze Metropolitana de su Nord Sardigna e abarrada fintzas a como sena risposta.
