Arrefùdus de lana de brebei sarda arricupedaus cumenti isolantis, piattaformas po fai chi funti disponibilis e a gratis is conoscentzias de is ricercadoris. Su gèniu femminili made in Italy bincit a Stoccolma. Duas italianas, Daniela Ducato e Anna Moreno, artziant in su podiu prus artu de is Europeus de s'innovatzioni. Sa prima in sa categoria "prodòtus ecologicus", sa segunda in cussa de s'"educatzioni". S'Italia torrat duncas a domu cun duas Euwiin International Awards 2013, unu de is prus bellus premius in su mundu po sa scientzia e sa tecnologia de s'inovatzioni green.
Daniela Ducato, imprenditora casteddaia, fait materialis po s'edilìtzia sene petrolu. Adi donau agiudu po sa nàscida de tipus diferentis de prodotus inovativus po s'efficentzia energetica e po sa saludi de sa domu. Prodotus premiaus meda bortras in Europa, prodotus cumenti isolantis termicus acusticus, incalchinu, pintùra, tessingius, pannellus de ena e de lana de brebei, terra crua, murus e coberturas prontus, coloris. Totus fatus cun una ingenieritzazioni industriali a s'avanguardia e cun s'imprea de materialis cruus, eccedentis e ottenius sene consumai su sartu e s'acua.
Anna Moreno, napoletana e romana de adòtadura, est ingeniera responsabili de su servitziu de formatzioni e informatzioni de s'Enea, Agenzia natzionali po is tecnologias noas, po s'energia e po su svilupu economicu sostenibili. su premiu est stetiu donau a issa "poita ca issa adi postu, de su 1999 fintzas a oi, a dispositzioni de totus, cun s'inventzioni de sa piattaforma e-learning: www.formazione.enea.it, is conoscentzias de is ricercatoris", si ligit in sa motivatzioni.
Funt noi in totu su mundu is inovatoras e inventoras ci ant bintu a Stoccolma in mesu a is 72 finalistas de tota s'Europa. In 5 minutus ant chistionau de is ideas e de is progetus a is giudixis internatzionalis. "Daniela Ducato e Anna Moreno duas italianas campionessas de inovatzioni", cun custus fueddus sa ministra svedesa po is Ugualis opportunitadis e viceministra a sa Cultura, Maria Arnholm, e sa ministra de is Affaris strangius nigeriana, Viola Onwuliri, ant donau is riconoscimentus.
No est noa a is premius, Daniela Ducato. "Fazzu is prodotus pensendi a is materialis impreaus de is pillonis po is nius – si nàrada – chi funt architetturas perfetas, criàadas cun ena de animali, de terra, de palla, totu in armonia cun mama terra. Po mei inovai est castiai cun in ogus de sa fromiga, andai a scola de is culumbus, fai su propiu chi faint is arritzus cun is tanas. Po ita ca sa natura scit ascurtai, nun stravulliat, nun fait àliga, impreat sceti su chi bastat. Su premiu est po sa terra mia, sa Sardigna, furriada de s'alluvioni, sperendi chi si possat artziai torra de pressi".
