Sa “Assemblea de sa limba sarda e de is àteras limbas de Sardigna”, in ocasione de s’addòbiu pro regordare sa Die mundiale de sa diversidade culturale pro su diàlogu e s’isvilupu fatu in Aristanis su 25 de maju de su 2017, si chèsciat a manera ufitziale pro ite ca:
1) Mancari is artìculos 5 e 6 de sa L.R. 26/1997 previdant sa costitutzione de s’Osservatòriu regionale pro sa cultura e sa limba sarda, giai dae annos meda s’Osservatòriu no acumprit prus is fainas prevididas dae sa lege e, in is ùrtimos annos, sa Regione non dd’at nemmancu nominadu.
2) Mancari s’artìculu 12 de sa L.R. 26/1997 previdat s’aprovu dae parte de sa R.A.S. de unu Pianu triennale de interventos pro s’avaloramentu de is limbas de Sardigna, giai dae annos meda sa Regione non tenet su Pianu e non respetat, duncas, sa previsione de sa lege.
3) Mancari s’art. 4 de sa L. 482/1999 previdat chi in is iscolas maternas s’educatzione linguìstica si serbat, a costàgiu de s’impreu de sa limba italiana, fintzas de s’impreu de sa limba sarda e de su catalanu (in S’Alighera) pro is fainas educativas e chi in is iscolas elementares e in is iscolas segundàrias de primu gradu si potzant impreare fintzas sa limba sarda e su catalanu (in S’Alighera) comente a aina de insegnamentu, a pustis de 18 annos dae su reconnoschimentu ufitziale in lege, custu deretu non amegat de agatare ancoras aplicu cumpridu e prenu.
S’Assemblea de sa limba sarda e de is àteras limbas de Sardigna domandat chi s’Ufìtziu iscolàsticu regionale, paris cun sa R.A.S., favoressant s’impreu de su sardu e de su catalanu (in S’Alighera) comente a limbas veiculares de s’insegnamentu. Sutalìniat, in prus, su bisòngiu de àere una lege noa chi disciplinet sa polìtica linguìstica in Sardigna, propassende sa L.R. 26/1997 e dende aplicu prenu a totu su su chi previdet sa L. 482/1999.
Est pro custu chi, pensende de fàghere cosa utilosa e profetosa pro chi is deretos linguìsticos de is Sardos siant respetados comente si tocat, s’Assemblea delìberat de costituire su “Osservatòriu pro sa Democratzia Linguìstica / Sardigna”, cun, a intro, unu Servìtziu giurìdicu, articuladu in su territòriu e formadu dae espertos de limba sarda e limbas de Sardigna, giuristas, espertos de deretu amministrativu, costitutzionale, tzivile e penale.
