“Est arribadu su momentu pro unu sèriu rilantzo de sa regione nostra. E pro custu so disposta a mi impinnare in politica”.
Ddu decrarat, in una nota, Ines Pisano, magistrata de su Tar de su Lazio, pronta a sa cursa pro sa càrriga de presidente de sa Regione Sardigna a sas imbenientes eletziones de su freàrgiu 2019. Su nùmene de Pisano tzìrculat dae tempus comente possìbile candidada de su tzentrudestra, acanta a cuddu de su segretàriu de su Psd’Az Christian Solinas, elègidu in Senadu cun sa Lega, partidu immoe prus forte e chi – segundu sos acòrdios internos – at a dèpere indicare su nùmene de chinie at a ghiare sa coalitzione a sas regionales.
Pisano, 48 annos, de cales binti in magistradura, est naschida in Bosa (Aristanis), ma bivit in Roma. “Depimus torrare a donare unu futuru a sa Sardigna, partinde dae su turismu, dae s’agricultura e dae s’imparu”, afirmat Pisano: “Isceti custu podet frimare su spopolamentu e torrare a donare unu benidore tzertu a sas giòvanas generatziones”.
