Sa Sardigna agiudat a sos territòrios de sos paisos de s’Àfrica subsahariana. Martis e finas a sabadu s’assessore de sos Afares generales de sa Regione, Filippo Spanu, at a èssere impinnadu in nd’una missione in Uganda ue at a sutascrìere in rapresentàntzia de su presidente Francesco Pigliaru, s’intesa intre sa Sardigna e sa Sub Regione de su Madi-West Nile, cun sa punna de dare inghitzare progetos comunes in sos setores de s’ambiente, de s’agricultura e de sas risursas forestales.
S’acòrdiu at a èssere sigladu chenabura in Adjumani, situada pròpiu in su Madi-West Nile, in sa banda nord-otzidentale de su paisu. In custa àrea, cun unu forte apentu agrìculu, b’at unu forte bisòngiu de sas esperièntzias e de sas bonas pràticas isperimentadas a manera positiva in unos àteros territòrios.
De sa delegatzione, ghiada dae s’assessore Spanu, faghent parte puru Luciano Gutierrez, pro retore pro s’internazionalizzazione e rechircadore de su Tzentru intedipartimentale “Nùcleu de Chirca in sa desertificazione” (NRD) de s’Universidade de Tàtari, Laura Altea, chi traballat in s’àmbitu de su matessi nùcleu de chirca, e sos funtzionàrios de s’Enas Maria Antonietta Dessena e Andrea Virdis.
S’esponente de sa Giunta in su cursu de sa missione at a atobiare su primu ministru ugandesu Ruhakana Rugunda, in paris cun sos ministros de s’Ambiente e de s’Agricultura, e s’ambasciadore de Itàlia Domenico Fornara.
“Sa Sardigna – sutalìniat s’assessore Spanu – depet donare balore a sos raportos cun s’isponda sud de su Mediterràneu e cun sos paisos de s’Àfrica subsahariana. Est un’ abertura netzessària siat pro agatare ocasiones de insertada pro sas impresas nostras siat pro contribuire a s’isvilupu de custos territòrios e arginare in manera cunsighente sos flussos migratòrios”.
