Sa Giunta at lompidu un’acordiu cun sos atuales ocupantes de sas aziendas agrìculas de Surigheddu e Mamuntanas in sa comuna de S’Alighera. Est unu passagiu fundamentale pro s’inghitzu de sas protzeduras de bèndida de su cumpèndiu valutadu 10 milliones de èuros. A sos atuales ocupantes, in base a sa transatzione oramai definida, ant a bènnere datos in cuntzessione unos àteros terrinos pro sa durada màssima de 20 annos a su prètziu ofertu dae sos matessi massajos in sede de tratativa.
“Est una tapa de mannu importu in su percursu de valorizatzione de s’intrea àrea. Immoe at a bènnere aviada sa fase de sa bèndida de sos terrinos de Surigheddu e Mamuntanas subra cales sussistet unu cuncretu riellu a banda de diversos potentziales comporadores”, at decraradu s’assessore de sos Entes Locales Cristiano Erriu.
Su cumpèndiu de Surigheddu e Mamuntanas tenet un’ estensione complessiva de belle 1.200 ètaros. Sas aziendas sunt istadas achiridas in su 1986 dae s’Ersat e insertadas in sos benes de su patrimoniu indisponibile de sa Regione. Posca sunt istadas trasferidas a su patrimoniu disponìbile de sa Regione e cunsignadas a s’Assessoradu de sos Entes locales in su 2001. Sas duas aziendas aligeresas possedint unu rilevante potentziale produtivu e rapresentant un’istòrica testimonia de su tessutu agropastorale de sa Nurra.
Documento utilizzato ai fini del contributo ricevuto ai sensi
dell’art.8 comma 12 lett.b) della Legge Regionale 13 aprile 2017, n.5 annualità 2018
