Abettande chi su tzentrumanca pighet unu detzisu, duos de sos tres nùmenes in pole position pro cùrrere a sas eletziones suppletivas de su 20 de su mese de ghennàrgiu crarint sa pròpia positzione in Facebook. Luchino Chessa faghet ischire de èssere “in manera piessigna emotzionadu: non so unu polìticu – ispiegat in su social – ma una persone normale chi gherrat una batalla tzivile. Abeto de ischire ite at a bènnere detzìdidu. Si serbit apo a èssere a disponimentu”. In manera diversa, s’iscritore e giornalista Francesco Abate paret declinare. “Torro gratzias a chi at pensadu a mie pro custu ruolu – iscriet – pro mi àere dadu in sas coladas chidas sa possibilidade de riflètere subra chi so a beru, subra ite bògio a fundu e cale penso siat su ruolu meu”. Finas a oe, pretzisa, “apo sighidu unu caminu de remenu tzivile e sotziale faghende minores gestos, a sa manera mea. E creo chi custa siat sa bia chi depo sighire a persighire: iscritore, giornalista, voluntàriu a su servìtziu de chi, comente a mene, at tentu su chintu marcadu dae sa maladia. Nudda deprus. Nudda de mancu”.
Documento utilizzato ai fini del contributo ricevuto ai sensi
dell’art.8 comma 12 lett.b) della Legge Regionale 13 aprile 2017, n.5 annualità 2018
