“Un’ala marginale de custa comunidade est refratària a sas règulas, ma andemus a in antis pro ite creamus chi sa majoria de sos nostros tzitadinosi dda pensat comente a nois, chi non faghimus àteru si non fàghere respetare sas règulas in su riellu de totus”.
Gai su sìndigu de Isporalatu, Francesco Furriolu, cummentat s’atentadu de cale est istadu vìtima sa note colada. A inghìriu a mesu note calicunu at dadu fogu a su portale de intrada de sa domo sua. Est istadu pròpiu Furriolu su primu a s’abbigiare de su chi fiat sutzedende e a domare su fogu in su nàschere in antis de mutire sos carabineris. Pro nudda intimididu, su sìndigu est tzertu chi sa comunidade siat cun s’amministratzione sua.
Pro sos amministradores de Isporalatu est su de tres atentados in duos annos. “Semus a sa farsa, paret una televonela, e su chi prus ispantat est sa totale ausèntzia de unu motivu – narat àncora Furriolu – inoghe sos riellos sunt cussos de una bidda de 400 abitantes”. A prus, sutalìniat, “amministremus in manera crara e lìmpida, comunichemus e nche cunfrontemus: custas sunt atitudines de gente pagu consapevole, pagu rispetosa e
pagu propensa a su diàlogu”.
Documento utilizzato ai fini del contributo ricevuto ai sensi
dell’art.8 comma 12 lett.b) della Legge Regionale 13 aprile 2017, n.5 annualità 2018
