At a èssere projetadu pro sa prima borta in pùblicu mèrcuris imbeniente, 5 de su mese de nadale in Casteddu su film inèditu ‘Autonomia trentanni’, giradu dae Guido Costa in su 1978 e iscritu cun Silvano Reina, Manlio Brigaglia paris a s’iscritore Sergio Atzeni, tando giòvanu a beru. Cuntzepidu pro tzelebrare sos 30 annos de s’autonomia de sa Sardigna, su documentàriu cuntenet filmados de archìviu e intervistas a sos rapresentantes de sas istitutziones e de su mundadu polìticu e sindacale de sos annos Setanta, intre sos cales s’ex presidente de sa Regione Pietrino Soddu, Andrea Raggioo, Efisio Corrias, Sebastiano Dessanay, Giannetto Lai e Villio Atzori.
Agatadu in su maju de su 2018, su film apartenet a su Fundu nominale ‘Guido Costa’ chi l’at depositadu a sa Cineteca Sarda a sa cale si depet su restàuru digitale in 4K, duradu belle un’annu e curadu dae Luca Portas e Cristina Secci. Mèrcuris a sas 10 est prevìdida sa projetzione de s’inèditu a su Cineteatro Nanni Loy de s’Ersu in bia Trentinu 15, durante su cunvegnu ‘Sardegna: sguardi e passaggi dell’autonomia speciale’, in ocasione de sos 70 annos de s’autonomia.
Sunt in programma sos interventos de su sìndigu de Casteddu, Massimo Zedda, de sos presidentes de su Cussìgiu e de sa Giunta regionale, Gianfranco Ganau e Francesco Pigliaru.
