Un’espostu contra sa bèndida de armamentos cara a s’Aràbia Saudita est istadu presentadu oe in sa Procura de sa Repùbblica de Casteddu de unu grupu de tzitadinos e de carchi assòtziu de s’ambiente e patzifistas, in sit-in dae in antis su tribunale de su cabulogu sardu.
“Semus bènnidos a connoschimentu de su fatu chi su 8 de santugaine 2016 – iscrient in unu documentu – unu raid aèreu giutu de sa coalitzione militare ghiada dae s’Aràbia Saudita at corfidu su bidditzolu de Deir Al-Hajari, in su Yemen Nord otzidentale, ochende una famìlia de ses persones”. Sos firmatàrios sustentant chi in su logu de s’atacu siant istados “atzapados de sos restos de bombas e un’aneddu de tasidura prodùidos dae sa Rwm Itàlia spa, operativa in Sardigna cun una fàbrica in territòriu de Domunoas.
