Su laboratòriu anàlisi de su Santa Bàrbara de Igrèsias at a torrare a cumintzare sa faina partende dae martis 21 austu pro s’esecutzione de sos esàmenes de apretu a suportu de sas fainas de prontu sucùrridu, ostetricia e ginecologia.
Sa novas bonas arribbat dae s’Azienda pro sa tutela de sa salude ma est istadu su guvernadore Frantziscu Pìgliaru a lu comunicare pro telèfono a su sìndigu de Igrèsias, Mauro Usai, chi custu mangianu aiat ocupadu pro protesta sa sala riuniones de s’assessoradu a sa Sanidade.
Su 13 austu, difatis, fiat istada sa matessi Ats a comunicare in d-unu disponimentu indiritzadu a s’Assl de Carbònia sa netzessidade de cuntzentrare totu sas fainas de anàlisi, apretosas e no, a Carbònia. A pustis de àere sentidu su presidente de sa Regione, ma fintzas su capu de Gabinetu de s’assessore Luisi Arru, Alfredo Schirru, e su diretore sanitàriu de s’Ats, Francesco Enrichens, su primu tzitadinu de Igrèsias at detzìdidu de lassare su presìdiu chi aiat organizadu cun su presidente de su Cussìgiu cumonale Danieli Reginali.
