“Sas graduatòrias de sos pùblicos cuncursos a tempus indeterminadu in sa sanidade in Sardigna ant a iscadire su 30 de cabudanni imbeniente, mentras in totu su restu de Itàlia ant a decadire su 31 de nadale. Unu trèulu totu sardu. Ddu denùntziat su sindacadu Fsi-Usae, chi pedit de adeguare su acabbu de iscadèntzia a cussu vigente in su restu de Itàlia.
“Apamus iscritu deretu a su presidente de sa Regione, a s’assessore regionale de sa Sanidade e a sa Cummissione regionale Sanidade”, faghet ischire sa segretària territoriale de sa Fsi, Mariangela Campus, “pro pedire un’emendamentu a sas atuales normativas regionales, pro si protzedere a s’allineamentu de sas iscadèntzias de sas graduatòrias a sa lege 27 nadale 2017 n. 205”.
