Sabadu 13 de su mese de santugaine in su bighinadu de Casteddu, chi in sardu donat su numene a sa matessi tzitade, sos abitantes ant organizadu unu flash mob pro protestare contra a sa situatzione de “degradu” chi nch’est in su logu.
Sa mobilitatzione, ghiada dae su comitadu ‘Casteddu de susu’ si tzerriat “Breakfast at transenna” e sighit un’atera manifestatzione chi nche fiat istada su ghennargiu coladu. “Sos tzitadinos – est iscritu in nd’unu comunicadu de imprenta – ant abetadu inutilmente una risposta dae su sindigu Massimo Zedda pro sa fine de sos traballos chi non acabant mai in su rione. Est arribadu s’atòngiu e no s’est moidu nudda. S’unica tzertesa est s’aumentu de sas transennas”.
Is problemas chi su comitadu denuntziat sunt ateros puru: pro esempiu sos orarios de sa Ztl chi non andant bene, sos ascensores chi tenent semper carchi cosa, sa ruga de Mazzini “serrada sena motivu”. “Est una situatzione legia meda – concluit sa nota – sos 1400 abitantes d’onnia die depent afruntare semper prus discumbenios”.
