Binti rapresentantes de sos assòtzios antimilitaristas ant manifestadu custu mangianu in Casteddu, in pratza de su Carmine, dae in antis sa sede de rapresentàntzia de su Guvernu, pro manifestare contra sa is armamentos pro s’Aràbia Saudita.
Sos esponentes de Cobas-Comitados de base de sa Sardigna, Adiquas Nuraxi, Casteddu Social forum, Amigos de Sardigna, Usb, Sardigna pulita, Comitadu de reconversione Rwm e Comitadu Carlofortini preoccupati, pregontant sa reconversione de sa fàbrica de bombas Rwm Itàlia de Domunoas, ue benint prodùidos bombas impreadas dae s’Aràbia Saudita in sa gherra in Jemen. In prus una delegatzione est intrada in sa sede de rapresentàntzia de su Guvernu, in pratza de su Carmine, pro cunsignare un’espostu.
“Bìndighi dies faghet nd’apamus presentadu un’espostu a su tribunale de Casteddu, chi est istadu posca cunsignadu fintzas a sa cònsole tedesca. Oe”, at ispiegadu Ennio Cabiddu, portaboghe de sos manifestantes e esponente de s’assòtziu Sardigna Pulita, “nd’apamus cunsignadu unu a su rapresentante de su guvernu, inoghe a Casteddu, cun sa recherta chi bèngiat inoltradu a sos presidentes de su Cussìgiu, de Camera e Senadu”.
