At a èssere su presidente de sa Regione Franciscu Pigliaru cras, lunis 2 de trìulas a sas 9.30 in sa sede de su Cunsòrtziu universitàriu nugoresu UniNuoro, in bia Salaris, in paris cun su diretore generale de s’Aspal Massimo Temussi, a su sìndigu de Nùgoro Andrea Soddu e a su commissariu de UniNuoro Fabrizio Muredu, a inaugurare sa fase de formatzione de su programma Talent Up, pensadu pro creare una noa generatzione de imprendidores capatzu de si cunfrontare in sos mercados internatzionales.
Su Presidente at a saludare sos chimbanta partetzipantes chi cumintzant sa fase de formatzione de su programma chi posca los at a batire pro àteros tres meses a s’èsteru in unu de sos primos binti eco-sistemas imprenditoriales, innovativos a livellu internatzionale.
Acabadu s’issèberu, sa colada chida s’Aspal, chi coordinat su progetu, at publicadu sa graduatòria de sos chimbanta partetzipantes, seberados in su totale de sas 110 dimandas arribbadas pro su bandu.
Sa fase de formatzione (su pre-treatment) at a cumintzare lunis, at a durare unu mese e at a èssere fata dae una Rti assentada dae sa Fundatzione Giacomo Brodolini de Roma, de sa Luiss (Lìberat Universidades internatzionales de istùdios sotziales Guido Carlo) e de Iefca, Istitutu de formatzione de Casteddu.
In custa fase sos partetzipantes ant a achirire cumpetèntzias de base in àrea marketing, contabilidade, istrategia de impresa, in unu percursu de formatzione in àula acumpridu in manera intrea in limba inglesa.
Sa fase imbeniente, su treatment, s’at a acumprire a s’èsteru e a su tèrmine de s’intreu cursadu sos partetzipantes ant a èssere prontos torrare in Sardigna e aviare sa pròpia impresa.
