IRGOLI, sàbadu 14-1-2017
Premiatzione “Prèmiu PINTORE de Giornalismu in sardu 2016"
……….
Sa cunsinna de sos Prèmios a sos binchidores de su “Prèmiu PINTORE de Giornalismu in sardu 2016", at a èssere fata in Irgoli su 14 de ghennàrgiu de su 2017, a sas 10.30 in sa Sala de su Cussìgiu de sa Comuna, carrera de Roma 1.
In sa tzerimònia de premiatzione de su Cuncursu in ammentu de s'iscritore e giornalista Giuanne Frantziscu Pintore (Irgoli 1939 – Nùgoro 2012), chi iscadiat su 30 de santandria de su 2016, ant a èssere presentes su sìndigu geom. Giuanne Porcu, sos premiados (pessones mannas e alunnos de sas iscolas chi ant leadu parte), professores, apassionados de limba sarda, amigos de Giuanne Frantziscu Pintore, sas Editziones Papiros.
In ocasione de sa premiatzione, ant a faeddare su Sìndigu Giuanne Porcu, su diretore editoriale de Papiros, Diegu Corràine e sos premiados.
Su Cuncursu, arribbadu giai a tres editziones, ideadu e organizadu dae Papiros editziones, cun su patronadu e unu finantziamentu de sa Comuna de Irgoli, ocannu, tenet duas setziones:
- una SETZIONE GENERALE, in ue sunt premiados 3 artìculos iscritos in sardu, in LSC (Limba sarda comuna), dae autores de cada edade. Cada autore at a retzire 250 € cadaunu e sa publicatzione in sa rivista EJA;
- una SETZIONE ISTUDENTES DE ISCOLA MÈDIA, in ue sunt premiados 3 artìculos iscritos in sardu dae classes de sas iscolas Mèdias inferiores de Sardigna. Cada artìculu at a retzire 300 € cadaunu e sa publicatzione in sa rivista EJA.
A totu sos premiados at a èssere cunsinnadu finas unu pratu in tzeràmica chi ammentat su PRÈMIU PINTORE.
