Fiat una de is istruturas prus importantes de su turismu de s'ierru sardu, un'òpera manna meda a 1500 metros de artària: una chentina de aposentos, un'àrea pro si pasare, ristorante, una sala pro ballare, piscina, pistas pro isciare. Immoe su 'Sporting Club Monte Spada', istrutura alberghiera fraigada in Fonne dae is frades Cualbu in is annos '70, est abbandonadu: una catedrale in su desertu in pitzu de su Gennargentu.
S'istòria
S'istrutura fiat istada impreada dae sa famìlia Cualbu e inchingiada in su 1973. In deghe annos est divènnida sa prus manna de sa Sardigna finas a is primos annos otanta, cando fiat istada serrada. Fiant is annos in is cales Fonne fiat connosta pro is fatos de delincuèntzia. A pustis dd’aiat comporada su Comunu, cun dinare de sa Regione, donende·dda in afidamentu a sa cooperativa Bruncu Spina. S'albergo est abarradu abertu pro unos deghe annos e posca cungiadu pro semper pro more de su bilantzu disacatosu e pro unu pretu tra su comunu e s'assòtziu chi dd’aiat in gestione.
