Si su procededdu de su contu antìgu adìa fueddàu cun Giampietro Tronci, inantis a fai una domixedda de palla, su lùpu malu nun du pappàdda cun unu mussiu sceti. Poita ca sa domu d'adìa fata forti e sigùra, cuntras a is lùpus e cuntras sa malasorti. Giampietro Tronci, igresiènti de 33 annus, est unu ingenièri ambientali cun s'idèa, de sempri, de sa bioedilizia. Duas annus fàidi adi potau in su meridioni de s’Isula s’idèa de su benidòri o, si olleus, du su passau atesu: sa domu de palla. Adi cumintzau a da progetai in unu terrenu de sa familla sua a Baréga, chi s'acàttada in mesu a is comunus de Igrèsias e Carbònia; a abrìli 2011 adi edificàu sa strutùra in linna e de màgiu a cabidànni adi frecuentàu letzionis in sa Repùbrica Tzèca e in Polònia. Sèrbidi sceti palla, terra, unu pagu de linna e puru, si sèrbidi, lana de prebei, cun una spesa totali de centu euros a su metru cuadru o pagu de prus.
“S'iscòpu nostru est cussu de fai una domu pagu costosa e ecològiga – nàrada Tronci – pighendi is materias primas chi funti giai in sa natura e chi funti a nudda chilometrus. Materialis cumenti sa palla e s'argidda chi, impastàdas imparis po fai is murus a sud e a est, boganta su mellus de sa domu in palla”.
Calincunu esempiu? “Is ballas de palla funti unu isolanti tèrmigu meda bellu (tres bortas prus de is parametrus normalis) mentris sa terra crùa règolada 'e sola s’umiditàdi e sa domu 'n di bessi' frisca in s'istadi e callentàda in s'ièrru, e cobèrta de s'umiditàdi”. S’impiantu elèttrigu depi d'essi alimentàu de panneddus fotovoltàigus. No est totu: “Puru s’ambienti 'n di guadàngiada cun custas domus, poita ca nun abbruxendi sa palla, ma impreindidda, nun fulliaus in s'atmosfera sa CO2“. No solu est di aici, ma fintzas est unu isolanti acùstigu e est anti-sismigù. E poita ca s'impreanta materialis naturalis, totus pointi traballai, sene arrischiu po sa saludi.
Cobertura e pamèntu? “Su pamèntu est fatu cun s'argidda, materiali chi non faidi arribai su pruini – si nàrada Tronci – e cun unu parquet artigianali; po s'incròstadura de sa cobertura si poidi impreai sa lana de prebei, chi est meda bella po sa regolatzioni termiga e còstada meda pagu poita ca si faidi sceti cun sa tundimenta”. Is formas de is domus de palla pointi essi perfettamenti scuadradas o stundadas: puru po s'estètiga, sa domu rivolutzionaria pota su pregiu de podi pigai totas is formas chi prus praxinti, poita ca su materiali si poidi modellai.
Unicu difetu, po imoi, est su pagu spratzinamentu de sa connoscèntzia de is tènnigas de su fàbbricu. Ma s’ingenièri “bio” adi acatau sa solutzioni: su situ progettobarega.wikispaces.com nun est su clàssigu portali web ma unu open source: “A su concetu de “copy right” apu postu a cuntra cussu de su “copy left” – si narada s'ideatori – cun una bacheca aundi si chistiònada de tènnigas, materialis po s'incròstadura e argumentis de is workshop chi beninti. Su progetu est unu work in progress: eusu a provai de arrespundiri a is bisongius de chini, po fai unu esempiu, pregùntada po unu suportu po fa is aposèntus”.
Innovativu e opertu a totus, Barega (chi est puru s’acronimu de “Bioarchitettura rete economica gruppo d’azione”) adi otèniu unu aggradu mannu a su PechaKucha 2011 de Casteddu e est arribau terzu a su cuncùrsu Bam 2012 de Barcellona, po s'attentzioni a s'ambienti e a is buciaccas de is meris de domu.
E po sa capatzidadi de furriai puru is contus prus famosus.
Traduzione di Cesare Giombetti
